ونسة حبوبات (1)
وفاق صلاح عبدالعال مبروك
يناير 2025
قعدت اونس في الوليدات وقلت ليهم يلا نحلم, لما ترجع بالسلامة يا وطن مجروح بينزف من غربة الفرقه المريرة والارض الواسعة ضاقت بالنفوس الضاجة لرحابة الامل البيخدر في ايديات البنات.
يا وليداتي نعمل محافظ انتاجية للمحاصيل التفضيلية ( تجمع للمصارف وشركات القطاع الخاص والحكومي والتعاونيات), نزرع وننتج وانتاجنا نديهو قيمته المضافة اليستحقا وعقود شراء مجزية محليا وعالميا وحنشوف زرعنا في العطائات العالمية (يا طوكيو بنجيكي ونقدل ونمشي فيكي- ناس السمسم وين) صورة مبهجة للاسرة السعيدة تبقي مارقه من الدغش شايله احلام الحياة الرغدة والشباب المنتج يرزح ويبشر بالعديلة. وانتاجنا تاني ما بيطلع خام وبس ,نفخر يوم نشوفه طالع مجرتق بهلال صنع في بلادي.
ونوسع الماعون ونرحب بالضيوف ونوسع باب الاستثمار الداخلي والاجنبي نعمر سوا ونسهل للجميع بنافذة واحدة في سويعات نعقد وبالزغاريد نبدا مشوار الامل ونسهل الاجرائات والتحاويل المالية للمستثمرين ومافي قاسية تلاقي مستثمر الا بس نقوله امييين. اجاويدنا وكبارنا يكونوا مجالس رعاية المستثمرين بالساهلة كله مقضي شوفناهو في رواندا قام بيهم فوووق والبيشوف في اخوهو سعيد.
ويلا نرعي للمواشي ونبدا رحلة الانتاج حقيقة, ضرع مليان حنان وامان بحليب صافي ووفير ومنتجاته تفيض تغرق كل وديان العطاشا والعجب في لحوما ديك, نتضرع ونقدل في رفوف العالمين منتج لحوم طاااعم وعضوي سلة غذاء للعالمين.
والعجب ساعة نشوف النجوم اللامعة شايلة شنطة من جلدنا مطقمة بشبط مخلوف نازلة في سجادا احمر حتي الزرارة من قرن تورا فحل قرنه باطح زي ابهاتنا يا حليلم.
لما المصانع بتساهيل من صناديق الخير باستثمار محلي واجنبي مباشرتدور للمكاين ونغني يلا هيلا هيلا تاني منو البيلحقنا, نحن جينا وكيه للمابينا. بتتسهل وحات ريحة الدعاش وفرحة الشفع و المطرا صبت, جاز المكاين يبقي اسهل من عجينة لانه وقودنا اخضر رااااقد شي مويه وشي شمس وشي هوا الله والرسول الواحد ده. وبدل نتضاير ونهرب من الكبار أكان في ضرايب او رسوم, نلقي كبارنا قدامنا يسهله في الصعاب, بتتيسر يا امل بكره والميعاد.
بكره يا الغالين نشوف بنكا مركزي بالحييييل يركزنا ويقوينا ويقود للرسن, احتياطي للذهب سعره ينافس للعالمين وحصايل صادره بسعرا حنين ما في داعي نهرب نبقي دغررييي مارقين. سياسات بالشوري والمشاركة والاتفاق تاني ما بيفضل فينا خاين. التشريع والقوانين النقدية وتطبيق استراتيجيات الشمول المالي تبقي فالنا والسماح لمؤسسات القطاع العام بحفظ الودائع في المصارف التجارية ويبقي ماعونا وااااحد, والتكنلوجيا والقرب بانشاء فروع قريبة من المودعين والمنتجين شطارة. ونشد الحيل بالاستشارات المالية والتأمين علي الودائع وعمليات المراجعة والمحاسبة والتدريب, ولمة الونسه يكون اساسي فيها التداول في الاسواق المالية ونشوف لمة الليدو في قدام شاشات التداول.
اما الدهب البيبرق سيد الرصة نلقي حكومتنا بتدفع مهرو بسعر البورصه وتقول كدي تجيب شركات عالمية ومعامل معتمده تفحص وتلقي ريده مدفونة في بطن الارض والبنوك تشتري بالسعر العالمي بالمقابل المحلي ويلا قوم يا جنيهنا داقر الاسترليني في مقامه واكيد مشكلة الدفع المقدم تلقالا حل والتهريب الا نشوفو في كوكب الاكشان. وبعد صرخة الميلاد نخت دهبنا قصاد خطوط ائتمان, ضمان وامان ونقول كدي نستورد الكاسر ضهرنا لييين ما الله يقدرنا وقريب ان شالله وماهو بعيد ويبقي انتاجنا محلي وبجدارة نكتفي حد الشبع لمن نبعبع ونمد قدحنا للعالمين.
اذن الاذان يا ولادي, قوموا لصلاتكم ولما تقضومن صلاتكم بحكيلكم عن باقي مشوارنا لعين الشمس
