ماذا لو إستسلم حميدتي
كتب الأمين العام للالية الوطنية للتحول المدني الديمقراطي ووقف الحرب كابتن طيار عادل المفتي على صفحته بالفيس بوك: ماذا لو إستسلم حميدتي أو علي الأقل نقول وافق علي إتفاق جدة .. ثم وافق علي الخروج من منازل المواطنين .. في كل بقاع السودان وخاصة الخرطوم والجزيرة والجنينة .. ماذا لو خرج علي الناس وعلي المجتمع الدولي وقال أنا موافق علي إتفاق جدة لنوقف الحرب ؟
هل تعرفون معني الشعور بالسلام والأمن والأمان ؟ هنالك من يعلم وهناك من لم يعلم ولن يعلم حتي يعيش عكسه فعلياً ولا نتمني له ذلك .. زي ما بقولو اليدو في الموية مازي اليدو في النار ( إنها الحرب يا أحباب ) .. أسألو أهلي في السودان وأسألو المشردين في كل بقاع الأرض .. بس أسألوهم إنتوعايزين شنو ؟
برضو نطمئن الشعب المكلوم .. تقصي الحقائق والمساءلة والمحاسبة عن ماحدث ودي لي قدام . المهم الحرب تقيف الآن وينفذ الإتفاق وكلو بي وقتو .
ولو حميدتي (ذكي) بعلن هذه الخطوة اليوم قبل الغد .. علي الأقل الدم المتبقي يقيف وكل الدلائل برضو بتقول كده .. وعندي إحساس شديد إنو ده حيحصل قريباً بإذن الله تعالي .. عشان (الصورة ما بتبقي أصل ) و ( الأصل ما ببقي صورة ) والأمل في الله .. طبعاً في ناس حقِنَّنَا وناس ما حَقِنَّنَا ( الدِش) بيموت في (يدهم) لكن بنقول ليهم بنلقي ليكم (صِرْفْة) بكسر الصاد وليس (صَرْفَة) .. الله غالب.
قال تعالي ( قُلْ يَا عِبَادِيَ الَّذِينَ أسْرَفُوا عَلَي أَنفُسِهِمْ لا تَقْنَطُوا مِن رَّحْمَةِ اللهِ إنَّ اللهَ يَغْفِرُ الذُّنُوبَ جَمِيعَاً إنَّهُ الْغَفُورُ الرَّحِيمُ ) ..
قال تعالي : ( وَإن جَنَحُو لِلسِّلمِ فَاجْنَحْ لَهَا وَتَوَكَّلْ عَلَي اللهِ إنَّهُ هُوَ السَّمِيعُ الْعَلِيمُ ) ..
خلونا نعود لله ونتوكل عليه وندعي .. والعافية درجات ..
الرأي شنو ؟
